Sýndu fyrirhyggju með séreignarparnaði hjá Lífeyrissjóði Vestmannaeyja.

Nú er rétti tíminn til að hefja séreignarsparnað með viðbótariðgjaldi í lífeyrissjóð. Því fyrr sem byrjað er að spara því betra. Séreignarsparnaður einstaklings getur numið allt að 4,0% af launum og launagreiðandi greiðir 2,0% mótframlag. Heildarsparnaðurinn getur því numið allt að 6,0% af launum. Það munar um minna ! Á tímabilinu frá 1. mars 2009 til 1. október 2010 er heimilt að greiða 6% framlag í viðbótarlífeyrissparnað og draga fjárhæðina frá skattskyldum tekjum.

Frá 1. janúar 1999 hefur einstaklingum verið heimilt að verja 2,0% viðbótariðgjaldi af launum í frjálsan lífeyrissparnað og draga þá fjárhæð frá skattskyldum tekjum sínum. Á árinu 2000 var heimildin aukin í allt að 4,0% af launum. Frá 1. maí 2000 hófu launagreiðendur að borga 1,0% mótframlag að auki, sem hækkaði í 2% frá 1. janúar 2002. Frá þeim tíma tvöfalda mótframlögin sparnað þeirra sem greiða 2,0% viðbótariðgjald af launum í viðbótarlífeyrissparnað.   Viðbótarlífeyrissparnaður ásamt vöxtum er til ráðstöfunar eftir að einstaklingur hefur náð 60 ára aldri.
Séreignadeild Lífeyrissjóðs Vestmannaeyja býður upp á tvær ávöxtunarleiðir í lífeyrissparnaði, Safn I og Safn II.

Árangur séreignadeildar hefur yfirleitt verið góður, en hún hefur starfað frá árinu 1999.
Nafnávöxtun deildarinnar var 12,36% árið 2009, meðaltal 5 ára 8,63% og meðaltal 10 ára 10,26%.
 

Safn I er áhættulítið verðbréfasafn, einkum samansett af íslenskum ríkisskuldabréfum og í litlum mæli af innlendum hlutabréfum og erlendum verðbréfum. Safnið hentar vel þeim, sem vilja tryggja sér jafna og stöðuga ávöxtun, með lágmarksáhættu. Það er heppilegt fyrir þá sem eiga ekki mikil lífeyrisréttindi, eru e.t.v. að nálgast eftirlaunaaldur og þola því illa áhættu í fjárfestingum. Áhættuminni ávöxtunarleiðir henta betur, þegar líður á ævina.
Hentar fyrir 55 ára og eldri.

Safn II hentar þeim, sem stefna að hærri ávöxtun og vilja taka nokkra áhættu. Eðli verðbréfa er að hækka eða lækka í verði. Þau verðbréf, sem sveiflast meira í verði, gefa jafnan hærri ávöxtun til lengri tíma litið. Áhættan við Safn II er einkum sú, að verð bréfanna sveiflist meira en í Safni I og að ávöxtunin verði ójafnari. Þetta safn hentar því betur þeim sem eru á miðjum aldri og yngri, og hafa tíma til að sitja af sér verðsveiflur markaðarins. Einnig hentar Safn II vel þeim, sem eiga góð lífeyrisréttindi fyrir, eða nokkrar eignir til að mæta eftirlaunaárunum.  Hentar fyrir 16 - 55 ára.